jeff

尤加利日記
2005-01-29 16:18:45 (UTC)

朋友間的距離

鍾意左返團契。平時同朋友吹水係報喜不報憂,只有返到團契可以報憂不報
喜。
前日仲為住朋友o既問題苦惱,今日就得到很好的意見同啟發。
話說今日返團契,大家分享o既時候,我同教會o既朋友講到我o既問題。原
來唔係得我一個有類似o既人際關係o既問題。我話我我感覺得到自己同身邊o
既朋友好似平時玩得好埋,又成日吹水,但係其實根本大家好似由此至終都冇
真正交心過。一方面覺得大家好似好近,但係轉頭一諗又會覺得好疏離。最慘
係為左唔令呢種疏離o既感覺發生而去刻意令自己投入佢地當中吹水講無聊
野,覺得內裡好辛苦。特別最近o既俾佢地o係度無無聊聊咁安d野落我頭上,
俾佢地奚落,仲要強顏歡笑,為o既係唔想令到彼此疏離。我自問其實冇咁大
量可以俾人地咁樣整古,但係又唔可以發作,內心真係好矛盾。
今日當我同呢個教會o既朋友講到呢個問題時,佢俾左我一個好好o既建議。人
同人之間相處原來好需要一種"距離"。當我地想拉近同某一些人o既距離o既
時候,我地係需要付出,要開放自己,去容忍對方,去盡力去幫助對方,總而
言之要令到對方覺得你係值得交心o既朋友。但係當我地不斷付出努力去拉近
彼此o既關係o既時候,原來到某一刻,我地會發現一個點係彼此不能再接近
(我覺得幾physics)。如果再刻意去接近對方o既時候,可能彼此都會受到傷
害。理由可能是對方覺得你太接近自己,令佢覺得有壓迫感;或者係因為你覺
得自己為拉近彼此關係付出得太多,而對方付出不及你,你覺得唔公平。去到
呢個時刻,我地就必須停低。至於呢個平衡點點樣搵,我地就係要不停咁付
出,然後收回,再付出,從中去探索要付出多少,才令到自己o既付出得到最
適合的距離。
"人之間要有距離"聽落好似一個好簡單o既概念,但係,對於距離o既拿掐,
我諗先係最值得我地學習o既地方。有d人會唔多付出,或選擇性付出,等人地
主動黎拉近同自己o既距離。我就渴望主動去拉近同人地之間o既距離,而且係
希望自己付出最多的,期望大家距離可以最近。但係因為自己付出的多得不到
自己想要有o既o固個"距離",令到我覺得自己付出不值得,而且心灰意冷。
o固位教會o既朋友最重要o既係提醒左我要承認大家之間必定會有距離,可能
係因為性格o既唔同,興趣o既唔同,習慣o既唔同,總之如果想最後唔會覺得
受傷害,就必定要留一段距離。
其實佢講o既道我應該一早就知,但係因為唔放心或者唔甘心有呢種o既距離,
所以令到自己受到傷害。或者我真係要重新學習如何量度同保留呢種距離,特
別係同朋友之間o既呢種距離。希望主會o係我呢個搖擺o既過程裡面引領我走
向正確o既方向。




Ad: