jeff

尤加利日記
2004-11-26 16:12:41 (UTC)

生日快樂

尋日,同左全莊o既同學出左去打邊爐,成支莊差唔多齊人咁滯,真係好少
有,真係好開心。只係俾人咁樣俾人地整左成晚...老實講,如果我唔係受害
者,我一樣會係禽獸一名,因為整人實在係非常開心o既一件事...唯有成晚
唔講野...
今日,絕對係拆禮物日。清點前後收到o既禮物數目,包括書兩本,聖經一
本,精美記事簿兩本,毛公仔手偶一大個,十字架一個,diy迷你蛋糕模型一
個,座檯月歷一個。結果單係自己中醫學院同學已經前後收左九件禮物,破哂
由前十九年生日o既紀錄,簡直係難以置信,我o既同學朋友對我實在太好喇,
感謝cora、大s、晶雞、sunny、ray、小燕、秋平、嘉怡、fancy、ava*3
(ava一人送左三份禮物)。
收到張生日咭,上面係質到密密麻麻都係字。仲有番到屋企一online,一on
就有三個人send左生日快樂俾我,睇下offline message,居然有成十個
happy birrthday o既meesage,有d嚇親...需知道我個icq list都係得o
固唔夠幾十人,咁o既數目o既祝賀語,突然覺得自己個人際面都幾廣下喎,
哈。
唯一美中不足可能係今日lunch o既組聚。諗住中醫好似從來未試過搞三代聚
會,所以諗住趁今日搵埋自己五靈脂加埋長強黎一齊聚下。不過,好快趣我就
覺得呢個係一個幾錯o既決定。首先係諗住同tina慶埋生日,點知自己五靈脂
o既人唔知道,結果搞到場面尷尷尬尬咁。到左食野o既時候,又自己五靈脂有
五靈脂傾,長強有長強自己傾。我就介乎兩組之間,更加唔知同邊邊傾好。結
果感覺上就好似叫哂大家黎請我同tina食餐飯,但係失去左組聚o既意義...
有d對唔住大家,對唔住tina...好明顯大家性格唔同,要三代同堂真係妙想
天開。
夜晚本來話有節目,不過原本o既節目改左尋晚,所以今晚突然變左冇哂約。
奇怪地,我冇可惜o既感覺。平時難得可以同阿媽一齊食飯,今晚阿媽居然休
息,可以生日番屋企同阿媽食餐飯,好似好耐都試過,覺得自己同阿媽o既距
離都未至於咁遠。
呢個生日完全係一個我心目中o既生日。好多人,好多朋友一齊過,上到大學
終於試到喇,感謝主。不過主,你可唔可以都令到我個胃快d好番呢?




Ad: