jeff

尤加利日記
2004-07-04 02:47:13 (UTC)

晶雞教會之旅

喂,晶雞,尋日個聚會好似...爭少少喎
尋日跟晶雞番左佢中學既教會。一坐低攞左張單張就嚇一驚,事關上面大大隻
字寫住「本年目標:350人,請踴躍領人赴會」,感覺上就好似我依家番緊o固
份工,寫住「本月目標,用家xxx人,請各位努力」...個人感覺啫...跟住就
係一個好似主日崇拜o既活動。全部人排排坐o係度唱詩歌,唱完就聽位大佬講
道。
點解我叫佢大佬,事關佢俾我既感覺真係好似民運領袖或黑社會大佬。只見佢
把口不停係咁講係咁講,一路講一路好似d領袖咁叫口號,要我地大叫「我依
家好喜樂」,「我愛天父」...仲有好多句,唔記得左喇,有d懷疑仲有冇去
到七一遊行...最衰係佢捉左個細路女出去折磨,叫佢出去跟佢嗌口號「我好
喜樂!!!」只見個女仔怕怕羞羞咁,俾佢o係外面當住百幾人面前o係度玩,要
佢講完一次又一次,無奈。即係咁,如果個o固個係男仔,或者係一個玩得既
女仔就冇所謂,叫個一睇就知唔玩得既女仔出去,有d做馬騮show咁囉...(唔
好介意呀下晶雞)
個崇拜最有feel既都係唱歌,查實我舊時彌撒都係覺得唱歌最有feel架啦。
仲有就係晶雞講o固個十一奉獻,見到d人係咁踴出去捐,雖然我唔知佢地俾幾
多,但係有咁多人我己經覺得好難得(你呀晶雞,好好反省下啦~),事關我地
舊時中學淨係得四旬節至會傳個盒仔入d零頭入去架咋。
完左崇拜就有分組聚會,又係一個感覺奇奇怪怪既活動。平時o固d聚會唔係唱
下歌,分享下大家呢排既感覺既咩?唔知點解會變左查經,開頭都冇咩,查查
下就發覺氣氛有d緊張,變左一個聖經辯論比賽,大家捉住聖經上面d字係咁不
停講講講,好似番番去cert時候考bible咁,仲要hold o固個(叫阿瑩呀呵晶
雞)一拋條問題就俾人怒插,好彩都有個讀bible既組長出黎講番兩句宗教既
說話,先至唔會變左好似政客o固d吹水辯論,全個過程參與討論既人主要都係
得三四個(總共有成十幾個,i think),感覺上聽完之後好似冇咩得著咁...
反而當晶雞同幾個教友走左去組訓,淨番五個男仔度,先好似傾番d團契會做
既野,包括講心事啦,開解人地啦,分享經歷啦,代禱啦等等,呢d先係我想
聽既野嘛...
晶雞,下次個聚會係咪仲係咁架,如果係我就要考慮下喎。聽講話德宜都有個
教會,阿神o固度又有個,唔知其他人仲有冇呢,可能我下次會去第二度架
喇!!!




Ad: