jeff

尤加利日記
2004-06-19 13:57:52 (UTC)

好大壓力呀

查實尋日已經想寫日記架喇,不過開工開太夜冇寫。
尋晚第一晚企街,我都知辛苦架喇。
我做左四個鐘,七點到十一點,企o係街度搵人做問卷。平時避人地d問卷就避
得多,真係自己落手去請人地做問卷又真係另一回事。d人o係你身邊呼呼聲咁
過,有d就離遠就避開你,有d就"好特登"咁扮哂"睇緊野"避開你既目光,有d
會好有禮貎咁同你講聲唔做,有d就笑笑口揮住手講唔駛,有d會怒超你,有d
會好惡咁鬧走你,有d會好唔耐煩咁"蔑"你,有仔既條仔會怒啤你,兩個人既
會好"自然"咁o係你身邊分開兩邊走過,然後過左你又好自然咁合番埋一齊,
三個人會撞開你。我試過俾人鬧"你唔好阻住我啦","走開啦你","唔好徒我
時間啦"。最驚嚇係有個睇落都幾斯文既女仔,我問佢可唔可以借一分鐘俾我
同佢做問卷,佢過左我之後居然陰聲細氣咁同我講"借咩呀借,你借mei
啦"....@@"(難以置信係出自佢把口)
總之o係四個鐘裡面見到好多種人,亦哂左好多口水。
試過一個鐘裡面搵到三四個人填問卷,亦有試過成個半鐘都冇一個人肯俾你
做,隻腳又軟,個心又灰...
做左四個鐘,總共搵左八個人填,個人覺得著左七個都係同情我先至幫我填。
不過有度好麻煩,就係我覺得個老闆真係有賺冇蝕,佢要我地攞左d人既電
話,打個電話去約佢地上去公司做免費consultant,再肯出錢做埋course先
會出錢俾我地。人我就搵左喇,但係電話仲未打,情況應該會仲惡劣,cut線
爆粗係預左...真係有d擔心筆錢唔知幾時先番到黎(今個月d錢要下個月二十
號先出,頂),憂心
要好似呃人咁,良心不安
仲有o camp camp book要開始做野喇,要開始搵人幫手喇,苦惱
d暗瘡o係我呢排唔夠訓之下又開始蠢蠢欲動,唉
壓力.......
-----------------------------------------------------------
今日係值得開心既日子,因為我好好彩
事關尋晚開工太夜,訓到隻豬咁,明明較左鬧鐘,今朝一起身居然已經成八點
三。今日要去屯門跟診既,唔遲得架嘛,一遲就要留o係診所o牛蟲,好憎咁
樣。所以我即刻彈起,用左三個字時間就衝出門口。本來想踩單車出上水搭
車,點知推單車落到樓下先見到出面落到dog shit咁,死死地氣推番上屋
企,咁又冇左我寶貴既一個字。結果我係擔遮行出去上水(要成三個字
的!!!),點知行到半路,就發覺冇哂雨,再行多陣,就發覺出太陽,仲熱到
嘔茄,我心諗,連個天都要我遲到,今次睇怕都冇架喇...出到上水上到車,
己經係八點九,成身大汗,正路計部車要半個鐘先出到屯門,遲到係一定既,
所以諗住打俾alice問診所d人可唔可以俾我直接去停車場截d醫師,賺左佢行
過黎同我唔駛行去診所既時間。點知佢地好堅決咁say: no!!。咁我諗,冇機
會啦。後尾我再打俾alice問佢係咪上左車,佢話係,但係仲有一個醫師o係
診所未走。所以我一落車就好似痴線咁係咁跑,雖然我都係諗冇咩希望,因為
跑過去診所都要兩個字...
點知當我跑到半路,就見到個熟悉既身影,係黃醫師!!!估唔到未走o固個醫
師係佢!!兩次跟車我都係跟佢,佢亦認得我,所以佢話等埋我先開車喎,太美
妙喇,估唔到我遲左三個字都仲可以跟到車,咁多既咒罵同不滿原來係多餘,
原來一早就有個美滿既安排,個天都真係對我不薄呀,感謝呀!!!真係好幸運
呀我!!!
-----------------------------------------------------------
cling問我將來有咩理想喎,我諗,我最想係做個好中醫,要clinical的,
唔做藥廠,唔做research,唔做生意,淨係想做clinical。可以既話我
prefer做流動車上面既醫師多過做駐診所既醫師,因為我可以見多d病人,接
觸多d人同事,咁先啱我性格。仲有,我想要做個出名既中醫多過想要做個有
錢既中醫。搵到一定既錢之後我想贈醫施藥,最好可以
俾我去做個無國界中醫師,將中醫帶去全世界,帶去俾d無錢睇病既人
...不過理想歸理想,現實還現實,將來讀書出黎要唔要"揸兜"都未知,到時
可能連苦力都要做,理想...就擺埋一邊啦...一切都太長遠喇...




Ad: