lavinlee

婷の魂遊記
2004-01-09 07:21:45 (UTC)

勁期待~

又懶左好幾日無寫到日記喇,呢幾日我有開心同唔開心,開心係因為我個好好人
既好姊妹今日會寄個枕頭比我,等我每晚都有得攬住個枕頭黎覺覺豬,哈哈...
可能郵局既人都會奇怪,點解會有人寄枕頭比人架?我都覺得寄"枕頭"比人的
而且確係幾罕見既,我自己都覺得係有d搞笑架囉!不過呢個枕頭絕非係一個普
通既枕頭黎,呢個枕頭係寧舍與別不同d架波...,會令我晚晚都發個好夢呢,好
神奇架!三日後,我就可以見到"佢"架喇,好心急啊!好多謝阿銳妹呀,錫晒你呀
*3*~呵呵~等埋Branda今個月22號返呢,我會仲開心呀!(咁22號都會好快到
架姐)仲有呀,前兩日收到表妹寄比我既手繩喇,我會成日帶住係身架喇,你唔
好咁介意我遲左至收到你張咭啦,"有心唔怕遲丫嘛",最重要既野,又唔係張
咭,而係果份你比我既心意呀,所以你真係唔使咁在意我遲左收你張咭啦,等你
表姐儲到d錢就會買d得意可愛既野寄過去送比你架喇!雖然你係新加坡,我係
美國,大家相隔咁遠,一個東一個西,但你要記住,你永遠都係我最好既表妹!我
地可以做到表姊妹係一種緣份黎架!

唔開心既事就係...我好似突然同個"親人"斷左聯繫,突然消失左個親人咁,大
家真係生疏左好多好多,令我覺得好似"有d野"咁,但奈何我又唔知中間發生左
d乜野事喎,(究竟係我自己諗得多左丫?定係有其他原因呢?)不安既感覺係我
心入面持續左都有個幾禮拜,我係好想知咩事但又冇機會比我去問,唉~~~一個
人又點會無緣無故變左呢?我近日來真係訓得唔好,每朝都要6點至訓得著,都
就快返學啦,仲係咁就死得啦!下個禮拜開始會忙喇,終於都可以唔使好似家下
咁無聊啦,日日都悶到抽筋呀,陰功!(真係同等死無咩分別)

今日同左好多鬼佬鬼婆溝通呀,係一個好好學習英文既好機會唷,希望開左學之
後,都可以有多d機會比我去練下我d英文啦!(我d英文真係屎到暈架=.=)我呢
幾日已經回好晒d信架喇(一次過寫咁多封信,寫到隻手真係好痛呀,紅晒...),
而家仲只係差一封就搞掂,聽日攞去寄埋....咁就大功告成勒!


Ad:0
Want some cocktail tips? Try some drinks recipes over here